Korgöz-Qızıltəpə-Şonqar strukturu Qərbi Abşeronda Şabandağ-Qaradağ antiklinal xəttində yerləşir. Strukturun uzunluğu V horizont üzrə 9 km, eni 860 m, hündürlüyü 650 m-dir. Yataq litoloji cəhətdən müxtəlif qalınlıqlı gillərin, qumların, əhəng daşı təbəqələrinin növbələşməsindən ibarətdir. Cənub qanadda qaz papağının mövcudluğu da müəyyənləşdirilib. Tektonik cəhətdən yataq mürəkkəb asimmetrik antiklinal quruluşlu olub, eninə istiqamətdə şərq və cənub-qərbə (“Qızıltəpə” sahəsi) doğru uzanır. Yatağın mürəkkəb tektonikasında Quşxana, Qızıltəpə və Şonqar palçıq vulkanları mühüm rol oynayır. Qırışığın oxundan keçən tektonik pozuntu yatağı iki bloka bölür. “Şonqar” sahəsinin tektonik quruluşu şimal-qərbdə uzanan dik yatımlı layların və Şonqar palçıq vulkanlarının olması ilə səciyyələnir.
“Korgöz” sahəsində neftvermə əmsalını artırmaq üçün mikrobioloji təsir üsullarından istifadə edilsə də, proses texniki və texnoloji səbəblərdən sonralar dayandırılıb.
“Korgöz-Qızıltəpə-Şonqar” yatağı 1931-ci ildən sənaye işlənməsinə daxil edilib.
“Korgöz-Qızıltəpə-Şonqar” yatağını SOCAR-ın “Azneft” İB-in Ə.Əmirov adına NQÇİ istismar edir.