Xəbərlər arxivi

24 Sentyabr 2021

SOCAR-ın prezidenti İraqın neft naziri ilə görüşüb

+

Sentyabrın 24-də SOCAR-ın prezidenti Rövnəq Abdullayev İraqın ölkəmizdə səfərdə olan neft naziri İhsan Əbdül Cabbar İsmailin rəhbərlik etdiyi nümayəndə heyəti ilə görüş keçirib. SOCAR-ın prezidenti qonaqlara Azərbaycanın qədim tarixə, zəngin ənənələrə malik neft sənayesinin inkişafı barədə məlumat vermiş, müstəqillik dövründə əldə edilmiş uğurlardan, həyata keçirilmiş möhtəşəm layihələrdən, yaradılmış texnoloji və iqtisadi potensialdan bəhs etmişdir. Hasilatın pay bölgüsü sazişləri üzrə görülmüş işlərin 95 faizinin ölkə daxilində yerli mütəxəssislər tərəfindən icra edildiyini qonaqların diqqətinə çatdıran R.Abdullayev “Əsrin müqaviləsi”nin imzalanmasından ötən müddətdə kadr hazırlığına xüsusi diqqət yetirildiyini vurğulamışdır. Qonaqlar SOCAR-ın tərkibində fəaliyyət göstərən Bakı Ali Neft Məktəbinin, müxtəlif peşə təhsili məktəblərinin fəaliyyəti barədə ətraflı məlumatlandırılmışlar.

İraqın neft-qaz sənayesində mövcud vəziyyət haqqında danışan nazir İhsan Əbdül Cabbar İsmail hazırda qarşılarında duran əsas vəzifələrdən bəhs etmiş, böyük təcrübəyə malik və özünü artıq dünya neft-qaz sənayesində ciddi bir şirkət kimi təsdiq etmiş SOCAR-la əməkdaşlıq etməkdə maraqlı olduqlarını nəzərə çatdırmışdır.

SOCAR-ın prezidenti əməkdaşlıq üçün geniş imkanlarının mövcud olduğunu, şirkətin istehsalat sahələri və həyata keçirdiyi layihələrlə tanışlıq üçün qonaqlara şərait yaradılacağını bildirmişdir.

20 Sentyabr 2021

SOCAR-da “Neftçilər Günü”nə həsr olunmuş təntənəli yığıncaq keçirilmişdir

+

Sentyabrın 20-də SOCAR TOWER-də neft-qaz və neft-kimya sənayesi işçilərinin peşə bayramı Neftçilər Günü münasibəti ilə təntənəli tədbir keçirilmişdir. Tədbirdə İqtisadiyyat naziri, SOCAR-ın Müşahidə Şurasının sədri Mikayıl Cabbarov, Şirkətin prezidenti Rövnəq Abdullayev, bp-nin Azərbaycan, Gürcüstan və Türkiyə üzrə regional prezidenti Qəri Counz, Müşahidə Şurasının üzvləri, eləcə də Azərbaycanda fəaliyyət göstərən neft şirkətlərinin rəhbər şəxsləri, qabaqcıl neftçilər iştirak etmişlər.

Tədbir iştirakçıları vətənimizin azadlığı uğrunda canlarını qurban vermiş Vətən övladlarının, o cümlədən şəhid neftçilərin xatirəsini bir dəqiqəlik sükutla yad etmişlər.

Tədbiri giriş nitqi ilə açan SOCAR-ın prezidenti Rövnəq Abdullayev demişdir: “Hər il peşə bayramlarında “Əsrin müqaviləsi”nin imzalanmasının ildönümünü qeyd edən neftçilərimiz bu bayram ərəfəsində “Azəri-Çıraq-Günəşli” yataqlarından 4 milyardıncı barel neft hasil etməklə yeni əmək qələbəsinə imza atmışlar. Bu böyük nailiyyət, əsası Ulu Öndər Heydər Əliyev tərəfindən qoyulan və hazırda möhtərəm Prezidentimizin müdrik rəhbərliyi altında uğurla davam etdirilən qalibiyyətlili enerji strategiyamızın möhtəşəm təntənəsini əks etdirir.”

SOCAR-ın prezidenti vurğulamışdır ki, bu il həm də “Şahdəniz” yatağının işlənilməsinə dair müqavilənin 25-ci ildönümünün qeyd edilməsi ilə əlamətdardır: “”Şahdəniz” yatağından təbii qazın Avropaya çatdırılması üçün Azərbaycan Prezidentinin təşəbbüsü ilə və daimi nəzarəti altında həyata keçirilən Cənub Qaz Dəhlizi ötən il istismara buraxıldı. Bu ilin əvvəlindən Dəhliz vasitsi ilə Avropa bazarlarına təxminən 5 mlrd. kubmetr, Türkiyəyə isə 5.7 mlrd. kubmetr “Şahdəniz” qazı nəql edilmişdir”.

Qeyd olunmuşdur ki, pandemiya şəraitində çalışmalarına baxmayaraq, SOCAR kollektivi istehsalat proqnozlarının öhdəsindən layiqincə gəlmişdir. Cari ilin birinci yarısında şirkətin müstəqil işlədiyi yataqlardan 3,9 milyon ton neft hasil edilmişdir ki, bu da ötən ilin eyni dövrü ilə müqayisədə 4 % çoxdur. Şirkətin qaz hasilatı göstəricisi 3,9 milyard kubmetr təşkil etmiş, artım isə ötən ilə nisbətən 6,3 % olmuşdur. Ötən 6 ayda ölkə üzrə 8,9 milyard kubmetr qaz ixrac olunmuşdur və bu həcm ötən ilin müvafiq dövrü ilə müqayisədə 35,7% çoxdur. Birinci yarımildə xarici bazarlara ötən ilkinə nisbətən 18,2 % daha artıq- 1,4 milyon ton neft və neft-kimya məhsulları göndərilib.

Pandemiya ilə əlaqədar çətinliklərə baxmayaraq ölkə daxilində və xaricdə planlaşdırılmış bütün layihələrin uğurla davam etdirildiyini vurğulayan SOCAR-ın prezidenti “Azərikimya” İstehsalat Birliyinin müəssisələrində aparılan yenidənqurma layihəsinin artıq başa çatmaq üzrə olduğunu, Heydər Əliyev adına Neft Emalı Zavodunun modernizasiya layihəsində isə hazırki mərhələ üzrə işlərin 81,5% tamamlandığını bildirmişdir.

Tədbirdə bp-nin Azərbaycan, Gürcüstan və Türkiyə üzrə regional prezidenti Qəri Counz və SOCAR-ın birinci vitse-prezidenti, akademik Xoşbəxt Yusifzadə çıxış etmiş, toplantı iştirakçılarını peşə bayramı münasibəti ilə təbriklərini çatdırmışlar.

Azərbaycan Respublikasının İqtisadiyyat naziri, SOCAR-ın Müşahidə Şurasının sədri Mikayıl Cabbarov çıxışında neft gəlirlərinin ölkə iqtisadiyyatının bütün sahələrinin inkişafında mühüm rol oynadığını qeyd etmişdir. Ölkəmizin zəngin neft-qaz ehtiyatlarının hasilatı artırmaq üçün geniş imkanlar yaratdığını nəzərə çatdıran M.Cabbarov dünya neft sənayesinin alternativ və bərpa olunan enerji, hidrogen istehsalı və rəqəmsal texnologiyalar kimi yeni çağırışlarla qarşılaşdığını bildirmiş, qlobal çağırışlara hazır olmağın artıq bir zərurətə çevrildiyini vurğulamışdır. Nazirin fikrincə, SOCAR ölkənin elm və təhsil müəssisələri ilə əməkdaşlığını daha da genişləndirməklə növbəti sənaye inqilabına hazırlaşaraq, yeni nəsil istehlakçıların yeni davranış tərzinə cavab verməyə hazır olmalıdır.

Sonra SOCAR-ın kadr, rejim və informasiya texnologiyaları üzrə vitse-prezidenti Xalik Məmmədov Azərbaycan neftçilərinin Azərbaycan Respublikasının Prezidenti İlham Əliyev cənablarına Azəri-Çıraq-Günəşli yataqlarında 4 milyard barel həcmində neftin çıxarılması ilə bağlı müraciətini oxumuşdur.

Tədbirin sonunda 2021-ci il üzrə SOCAR-da keçirilmiş “İlin ən yaxşıları” müsabiqəsinin qalibləri, eləcə də “Fəxri neftçi” döş nişanı və “SOCAR-ın Fəxri Fərman”ı ilə təltif olunan neftçilərin bir qisminə mükafatlar təqdim edilmişdir.

Xatırladaq ki, Azərbaycan Respublikası Prezidentinin 16 avqust 2001-ci il Sərəncamına əsasən hər il “Əsrin müqaviləsi”nin imzalandığı tarix - sentyabrın 20-si Azərbaycan Respublikasında “Neftçilər Günü” peşə bayramı kimi qeyd olunur.

20 Sentyabr 2021

SOCAR rəhbərliyi Ulu öndər Heydər Əliyevin məzarını ziyarət etmişlər

+

Sentyabrın 20-də “Əsrin müqaviləsi”nin imzalanmasının ildönümü və Azərbaycan neft-qaz sənayesi işçilərinin peşə bayramı “Neftçilər günü” münasibəti ilə SOCAR rəhbərliyinin nümayəndələri xalqımızın Ümummilli lideri Heydər Əliyevin Fəxri xiyabandakı məzarını ziyarət etmişlər. Şirkət nümayəndələri milli dövlətçiliyimizin möhkəmlənməsində, iqtisadiyyatımızın inkişafında müstəsna rol oynamış yeni neft strategiyasının banisi Ulu öndər Heydər Əliyevin unudulmaz xatirəsinə bəslədikləri dərin hörmət və ehtiramın ifadəsi olaraq onun ruhu qarşısında baş əymiş, məzarı üzərinə tər çiçəklər düzmüşlər.

SOCAR rəhbərliyinin nümayəndələri Fəxri xiyabanda görkəmli oftalmoloq alim, akademik Zərifə Əliyevanın məzarını da ziyarət ediblər.

18 Sentyabr 2021

SOCAR Gürcüstanda yaşayan azərbaycanlılar üçün yeni qaz xətti, idman kompleksi və uşaq bağçasını inşa edib

+

SOCAR ötən ilin oktyabrından Gürcüstanın Kvemo-Kartli regionunda, azərbaycanlıların kompakt yaşadığı kəndlərdə həyata keçiirdiyi sosial layihələr çərçivəsində bir sıra tikinti işlərini başa çatdırmışdır. Şirkətin prezidenti Rövnəq Abdullayev, Gürcüstanın Baş naziri İrakli Qaribaşvili, Azərbaycan Respublikasının fövqəladə və səlahiyyətli səfiri Faiq Quliyev, Kvemo-Kartli və Kaxetiya regionlarının qubernatorları və Gürcüstanın digər hökumət rəsmilərinin iştirakı ilə Qızılhacılı, Qabalı və İlməzli kəndlərində yeni obyektlərin açılış mərasimləri keçirilmişdir. Marneuli bələdiyyəsinin 11 minə yaxın əhaslisi olan Qızılhacılı kəndində beynəlxalq standartlara uyğun, yeni texnologiyalar əsasında tikilmiş idman kompleksin açılışında bildirilmişdir ki, bu qurğu basketbol, voleybol və futzal kimi idman növləri üzrə beynəlxalq yarışların keçirilməsi üçün uyğundur. Müasir istilik və soyutma sistemləri, yanğın əleyhinə vasitələr ilə təmin olunmuş kompleksin tribunaları 150 tamaşaçıya hesablanmışdır. Binanın ətrafı abadlaşdırılmış, kompleksin yaxınlığındakı futbol stadionu yenidən qurulmuş, buraya yeni sintetik qazon döşənmiş, metal çəpərlər, tribunalar, işıqlandırma sistemi təmir edilərək yenilənmiş, tamaşaçılar üçün müasir oturacaqlar qoyulmşdur.

Laqodexi bələdiyyəsinin 17 min əhalisi olan Qabalı kəndində isə uşaq bağçası tikilmiş və Gürcüstan dövlətinə təhvil verilmişdir. Qeyd olunmuşdur ki, binanın layihəsi Gürcüstan ərazisində müəyyənləşdirilmiş tikinti standartlarına və tələblərinə uyğundur. Bağçada müasir tipli oyun meydançası inşa edilmiş, bütün ərazi boyunca işıqlandırma sistemi qurulmuş, abadlaşdırma işləri aparılmışdır. Açılış mərasimində çıxış edən SOCAR-ın prezidenti demişdir: “Gürcüstan Respublikası strateji tərəfdaşımız olmaqla yanaşı həm də yüz minlərlə soydaşımızın doğma vətənidir. Bu ölkənin qazpaylayıcı şəbəkəsinin operatoru olan SOCAR öz sosial məsuliyyətini daim diqqət mərkəzində saxlayır. Gürcüstanda həyata keçirdiyimiz bir çox layihələrin məqsədi burada yaşayan soydaşlarımızın cəmiyyətə inteqrasiyasına, onların yaşayış şəraitinin yaxşılaşdırılmasına dəstək verməkdir. Hər bir insan övladlarının gələcəyini düşünür, onların təlim-tərbiyəsi qayğısına qalır. Bu gün biz övladlarımızın gələcəyinə sərmayə qoyuruq. Soydaşlarımızın yaşadığı məntəqələrdə gələcəkdə də müasir uşaq bağçaları və idman komplekslərinin, ictimai təyinatlı obyektlərin inşa olunmasına, gənc nəslin inkişafına, təhsil və tərbiyyəsinə töhfə verməyə davam edəcəyik.”

SOCAR prezidenti həmçinin Kvemo-Kartli regionunun azərbaycanlıların kompakt yaşadığı İlməzli kəndində SOCAR Georgia Gas MMC tərəfindən çəkilən 12,7 km-lik qaz kəmərinin açılışında da iştirak etmişdir. İstismara verilən yeni qaz kəməri 227 potensial abonenti ümumi qazpaylayıcı şəbəkəyə birləşdirəcək. Hazırda Kvemo Kartli regionunda 125 347 aktiv abonent qeydə alınmışdır ki, onların da 30 166 nəfəri Marneuli bələdiyyəsinin payına düşür.

7 Sentyabr 2021

SOCAR-da CDC şirkətinin 25 illik yubileyi qeyd olunub

+

Sentyabrın 6-da SOCAR-ın birgə müəssisəsi olan “Caspian Drilling Company”-nin (CDC) 25 illik yubileyi qeyd edilmişdir. Tədbirdə SOCAR-ın rəhbər heyəti və tərəfdaş şirkətlərinin nümayəndələri iştirak etmişlər. SOCAR-ın prezidenti Rövnəq Abdullayev, şirkətin birinci vitse-prezidenti akademik Xoşbəxt Yusifzadə və CDC şirkətinin baş direktoru Fərid Axundov qonaqlar qarşısında çıxış etmişlər. Üzən dəniz qazma qurğularının təmiri, modernləşdirilməsi, onlara nəzarətin həyata keçirilməsi və texniki xidmətlərin göstərilməsi, eyni zamanda dənizdə neft-qaz quyularının qazılması və təmiri üzrə ixtisaslaşmış CDC şirkəti yarandığı vaxtdan bu günədək böyük inkişaf yolu keçmişdir. Ötən 25 ildə “Caspian Drilling Company” Xəzər dənizinin Azərbaycan sektorunda hasilatın pay bölgüsü sazişləri üzrə həyata keçirilən 16 dəniz layihəsində kəşfiyyat və sualtı qazma işlərini müvəffəqiyyətlə icra etmişdir. “Azəri-Çıraq-Günəşli” və “Şahdəniz” yataqlarının kəşf olunmasında CDC-nin kəşfiyyat-qazma əməliyyatları mühüm rol oynamışdır.

Tədbirdə çıxış edən SOCAR-ın prezidenti Rövnəq Abdullayev CDC şirkətinin əmək kollektivini təbrik edərək demişdir: “Azərbaycan Respublikasının Prezidenti İlham Əliyev cənabları tərəfindən qarşımıza məqsəd qoyulmuşdur ki, neft sənayesi yalnız xam neft və təbii qazın satışı ilə deyil, həm də əlavə dəyər yaradan məhsul və xidmətlərlə ölkəmiz üçün əlavə qazanc mənbələri yaratmalıdır. Bu gün ölkəmizdə həyata keçirilən ən böyük beynəlxalq səviyyəli layihələrdə əsas rolu məhz dövlətə məxsus olan yerli şirkətimiz CDC həyata keçirir. Sırf xidmət sahəsində ixtisaslaşmış CDC fəaliyyəti dövründə mühüm uğurlara imza atmışdır. Bu gün deyə bilərik ki, CDC dünyanın öndə gedən qazma şirkətləri ilə rəqabət aparmaq qabiliyyətindədir. 500-ə yaxın yüksək səriştəli işçi heyəti üçün əlavə iş yerləri yaradan, daim mənfəətlə işləyən CDC ona bəslənilən inam və etimadı doğrultmuşdur.

Son illər müəssisənin fəaliyyətində daha böyük irəliləyişlər hiss olunur. Məhz CDC-nin rəhbərliyi altında inşa edilən “Heydər Əliyev” 6-cı nəsil yarımdalma qazma qurğusu vasitəsi ilə şirkətin qazmaçıları Xəzər dənizində 7411 metr dərinliyində ən dərin quyunun qazılmasına nail olmuşdur. Bu gün sizin fəaliyyətiniz yalnız Azərbaycanla məhdudlaşmır. İsraildə və Türkiyədə qazma işləri həyata keçirmisiniz. İnanırıq ki, qarşıda sizi daha böyük nailiyyətlər gözləyir”.

Yubiley tədbirində çıxış edən CDC rəhbərliyinin nümayəndələri ötən müddətdə qazanılmış zəngin təcrübəyə arxalanaraq bundan sonra da əzmkarlıq göstərəcəklərini, yeni neft strategiyasının daha böyük qələbələr qazanması üçün var gücləri ilə çalışacaqlarını bildirmişlər.

Sonda SOCAR prezidentinin müvafiq əmrləri ilə CDC şirkətinin bir qrup əməkdaşı SOCAR-ın “Fəxri Fərman”ı və “Fəxri neftçi” döş nişanı ilə təltif olunmuşlar.

CDC şirkəti 1996-cı ildə yaradılıb. “Heydər Əliyev”, “Dədə Qorqud” və “İstiqlal” yarımdalma qurğuları ilə Xəzər dənizində qazma əməliyyatlarını həyata keçirən CDC cari ildə Qazaxıstandan gətirilmiş “Sətti” özüqalxan qazma qurğusunun modernizasiya işlərini başa çatdırmışdır. Qurğu Abşeron yarımadasının SOCAR və bp tərəfindən birgə istismar olunan dayazsulu hissəsində əməliyyatlara cəlb olunub.