Xəbərlər arxivi

19 Sentyabr 2020

Prezident İlham Əliyev “Abşeron” yatağı üçün dayaq bloklarının təməlqoyma mərasimində iştirak etmişdir

+

“Abşeron” layihəsinin dəniz əməliyyatlarına start verildi

Sentyabrın 19-da Azərbaycan Respublikasının Prezidenti cənab İlham Əliyev Heydər Əliyev adına Bakı Dərin Özüllər Zavodunda SOCAR-ın BOS Şelf şirkəti tərəfindən tikilmiş “Abşeron” yatağında quraşdırılacaq dörd əsas dayaq bloku və digər sualtı qurğularının dəniz işlərinin təməlqoyma mərasimində iştirak edib. SOCAR və TOTAL-ın birgə operatoru olan JOCAP tərəfindən işlənilən “Abşeron” yatağında istismar ediləcək platforma və onunla əlaqədar qurğuların tikintisinə dair müqavilə 2018-ci ildə imzalanmış, bununla bağlı işlər “Azəri”-“Çıraq”-“Günəşli”, “Şahdəniz-2” və s. kimi layihələrin həyata keçirilməsində çoxillik təcrübəyə malik BOS Şelf şirkətinə həvalə olunmuşdur.

Əvvəlcə “Abşeron” yatağı və burada quraşdırılacaq dayaq bloklarının tikintisindən bəhs edən film nümayiş olunmuş, Azərbaycan Respublikasının Prezidentinə məlumat verilmişdir ki, “Abşeron” layihəsi üzərində iş zamanı BOS Şelf Azərbaycanda ilk dəfə bütün mühəndislik, təchizat, tikinti, quraşdırma (EPCI) işlərini həyata keçirməklə layihənin tam təminatla təhvil verilməsi (turn-key project) üsulunu tətbiq etmişdir. Layihənin konseptual mühəndislik hesabatları SOCAR-ın ''Neftqazelmitədqiqatlayihə'' institutu tərəfindən həyata keçirilmiş və işlənilmə üçün sənədlər beynəlxalq layihələrdə müvafiq təcrübəyə malik olan Mariel və SOCAR KBR şirkətlərinə verilmişdir.

“Abşeron” yatağından qazın hasilatı üçün quraşdırılacaq platforma öz növünə görə unikal sayıla bilər. Azərbaycanda yerli və xarici şirkətlər tərəfindən həyata keçirilən digər iri layihələrin əksəriyyətindən fərqli olaraq, bu layihə üçün platformanı kənardan, yəni Neft Daşlarında yerləşdirilən moduldan idarə etmək üçün innovativ həll yolları işlənilib hazırlanmışdır. Yataqdan qazın hasil olunması prosesinə, həmçinin platformada icra edilən əməliyyatlara Neft Daşlarında bu layihə üçün modernləşdirilmiş modulda olan bir neçə operatordan ibarət heyət nəzarət edəcək ki, bu da zamana və vəsaitə əhəmiyyətli dərəcədə qənaət olunmasına imkan verəcəkdir. Modulun quyudan 34 km, platformadan 3 km məsafədə yerləşməsi qazın hasilatı, emalı və nəqli zamanı təhlükəsizliyi və keyfiyyəti təmin edəcək.

“Abşeron” layihəsində Xəzərdə ilk dəfə “boru içində boru” (pipe in pipe) texnologiyası tətbiq ediləcəkdir. Boru xətti üçün xüsusi olaraq istehsal edilmiş çoxqatlı izolyasiyalı borular istifadə olunacaqdır. Bu məqsədlə layihə çərçivəsində SOCAR-ın birgə müəssisəsi olan Caspian Pipe Coating (CPC) şirkətinin istehsal imkanları modernləşdirilmişdir. CPC şirkətinin modernizasiyası gələcək neft-qaz layihələrinin reallaşdırılmasında istifadə ediləcək müvafiq istehsalın Azərbaycanda təşkil edilməsinə əlverişli şərait yaratmışdır. Boru xəttinin quraşdırılması işləri BOS Şelfin iştirakı ilə konsorsium tərəfindən “İsrafil Hüseynov” borudüzən gəmisi vasitəsilə həyata keçiriləcəkdir. Əsas avadanlıqlar ABŞ, Almaniya, İtaliya, Sinqapur və s. daxil olmaqla onlarla ölkədən alınıb gətirilmişdir. Avadanlığın nəql edilməsi prosesinə minlərlə quru, dəniz və hava nəqliyyatı vasitələri cəlb olunmuşdur.

Tikinti işlərinin həcminə ümumi çəkisi 10 000 tona yaxın olan dörd əsas və altı köməkçi dayaq blokunun, körpülərin, estakadaların, məşəl sisteminin, sualtı qurğuların, boru xəttinin, modulların inşası və quraşdırılması daxildir. Lahiyə çərçivəsində “Qurban Abasov” gəmisinin modernizasiyası həyata keçiriləcək, “Azərbaycan” kran gəmisi yükqaldırma qabiliyyətinin artırılması məqsədilə yenidən sertifikatlaşdırılacaq.

REDAKTORLAR ÜÇÜN QEYD:

“Abşeron” yatağı Xəzər dənizinin Azərbaycan sektorunda, Bakının 100 km cənub-şərqində, dənizin 500 metr dərinliyində yerləşir. Yatağın ehtiyatları 350 milyard kubmetr qaz və 45 milyon ton kondensat həcmində qiymətləndirilir. Yataq, SOCAR və TOTAL-ın birgə operatoru JOCAP şirkəti tərəfindən işlənilir və Azərbaycanda ən iri qaz-kondensat yataqlarından biri olmaqla, TOTAL-ın iştirakı ilə son 10 ildə aşkar olunmuş ən böyük yataqdır. Yatağın istismarı Azərbaycanın təbii qaza artmaqda olan daxili tələbatının təmin edilməsində əhəmiyyətli töhfələr verəcəkdir.

Qeyd edək ki, Heydər Əliyev adına Bakı Dərin Özüllər Zavodu (BDÖZ) 20-ci əsrin 80-ci illərindən başlayaraq Azərbaycanın neft-qaz sektorunun inkişafında əhəmiyyətli rol oynamaqdadır. Azərbaycanın ümummilli lideri Heydər Əliyevin şəxsi təşəbbüsü və təkidi ilə SSRİ Nazirlər Soveti tərəfindən dənizin dərin hissəsində dayaq bloklarının istehsalı üzrə zavodun tikintisi barədə qəbul edilmiş qərara əsasən, zavodun tikintisinə 1978-ci ildə başlanılmışdır.

1984-cü ildə tikilib istifadəyə verilmiş və ildə 60.000 ton metal-konstruksiya istehsal etmək qabiliyyətinə malik olan BDÖZ Azərbaycanın enerji sektorunun gələcəyinə qoyulmuş nəhəng bir sərmayə rolunu oynamışdır. Zavodun güclü istehsalat qabiliyyəti SOCAR-ın BOS Şelf şirkətinin gələcək uğurlarının əsas elementinə çevrilmişdir. Şirkətin iri layihələri məhz bu zavodun infrastrukturundan istifadə etməklə həyata keçirilmişdir. BDÖZ-ün operatoruna çevrildikdən sonra BOS Şelf zavodda yenidənqurma işləri keçirmişdir. Hazırda SOCAR-ın BOS Şelf şirkətinin idarəetməsi altında zavod təkcə Azərbaycanın deyil, həm də bütün Xəzər hövzəsi ölkələrinin ən iri tikinit-quraşdırma müəssisəsinə çevrilməkdədir.

19 Sentyabr 2020

Qaraçuxur qəsəbəsində neftçilərə yeni mənzillərin orderləri təqdim edildi

+

Sentyabrın 19-da-Neftçilər günü ərəfəsində neft-qaz sənayesi işçiləri üçün Suraxanı rayonunun Qaraçuxur qəsəbəsindəki İlqar Mirzəyev küçəsi 3 ünvanında inşa edilən 1 girişli 16 mərtəbəli və mansarddan, eləcə də ikimərtəbəli zirzəmidən ibarət olan yeni yaşayış binası istifadəyə verildi. 96 mənzilin olduğu binada, ümumilikdə, 16 üç otaqlı, 64 iki otaqlı və 16 bir otaqlı mənzil var. Binanın ümumi sahəsi 8263,20 m2, 1-ci mərtəbədə yerləşən qeyri yaşayış sahəsi isə 734,2 m2-dir. Bina su, elektrik xətti və təbii qazla təchiz edilib. Tam təmirli mənzillər mətbəx mebeli, qaz plitələri, dəhliz mebeli və çilçıraqla təmin olunub, həyətdə istirahət guşəsi yaradılıb, ətraf ərazi abadlaşdırılıb.

Mənzil alan neftçiləri təbrik edən SOCAR prezidenti Rövnəq Abdullayev deyib: “Dünyada baş verən qlobal pandemiyanın iqtisadiyyata mənfi təsirlərinə baxmayaraq, Azərbaycan Respublikasının Prezidenti möhtərəm İlham Əliyev cənabları neftçilərin sosial məişət şəraitinin yaxşılaşdırılmasını daim diqqət mərkəzində saxlayır. Əməkdaşlarımızın növbəlilik əsasında mənzillərlə təmin edilməsi şirkətimiz üçün əsas prioritetlərdəndir. Biz, bundan sonra da bu istiqamətdə işlərimizi davam etdirəcəyik”.

Rövnəq Abdullayev binadakı mənzillərin şəraiti ilə tanış olub. Sonra burada mənzil alan neftçilərə order və açarlar təqdim edilib. 2018-ci ilin aprelindən tikintisinə başlamış binanın sifarişçisi “Neftçi” MTK, layihəçisi “Kəpəz” YİF, podratçısı isə “Bakıyaşayıştikinti” MMC-dir.

Xatırladaq ki, mənzil uçotunda olan neftçilərin mənzil şəraitinin yaxşılaşdırılması və yeni yaşayış binalarının tikilməsi məqsədi ilə 2010-cu ildən “Neftçi” mənzil-tikinti kooperativi yaradılıb. Yaxın zamanlarda Bibiheybət ərazisində yeni yaşayış kompleksinin tikintisinə başlanılacaq.

17 Sentyabr 2020

Dalma Elektrik Mühərriklərinin Təmiri Sahəsi yenidənqurmadan sonra istismara verildi

+

Sentyabrın 17-də “Azneft” İB-nin son illərdə fəaliyyəti genişləndirilən və daha da təkmilləşdirilən Dalma Qurğularının Təmiri və Kirayəsi üzrə Eksperimental İstehsalat Müəssisəsinin Dalma Elektrik Mühərriklərinin Təmiri Sahəsi yenidənqurmadan sonra istismara verilmişdir. Bu münasibətlə SOCAR rəhbərliyinin iştirakı ilə keçirilmiş mərasimdə dalma elektrik mühərriklərinin təmiri, çuquntökmə və mexaniki yığma sahələrindən ibarət Eksperimantal İstehsalat Müəssisəsində dalma qurğularının təmiri üçün lazım olan 150 adda ehtiyat hissəsinin istehsalı üçün şərait yaradıldığı qeyd edilmişdir. Məlumat verilmişdir ki, neftqazçıxarma idarələrinin və digər təşkilatların tələbatını ödəmək üçün ildə neft hasilatını tənzimləyən 14000 ədəd keramiki və bərk xəlitəli tənzimləyicilərin istehsal olunduğu İstehsalat Müəssisəsinin yenidənqurma layihəsi çərçivəsində 1-ci və 2-ci buraxılış kompleksləri üzrə görülmüş tədbirlər nəticəsində inzibati bina, qazanxana, yeraltı komunikasiya xətləri, elektrik yarımstansiyası, su və yanğın su nasosxanası, mexaniki yığma sahəsi beynəlxalq standartlara uyğun yenidən qurulmuş, avadanlıq bazası yenilənmişdir. Layihənin 3-cü buraxılış kompleksi çərçivəsində bu gün istifadəyə verilən Dalma Elektrik Mühərriklərinin təmiri sahəsində 4 mərtəbədən ibarət inzibati - məişət binası, istehsalat və sınaq sahələri əsaslı təmir edilmiş, dalma avadanlıqlarının təmiri prosesində istifadə olunan qeyri-standart avadanlıqlar tam yenilənmiş, işçilərin əmək və sosial şəraiti yaxşılaşdırılmışdır.

SOCAR-ın prezidenti Rövnəq Abdullayev neftçilərin qarşıdan gələn peşə bayramı- “Neftçilər günü” münasibəti ilə müəssisənin əmək kollektivini təbrik etmiş, onlara uğurlar arzulamışdır. Müəssisədə həyata keçirilən yenidənqurma və təmir işlərini yüksək qiymətləndirən şirkət prezidenti demişdir: “İnanıram ki, müasir avadanlıqlardan və texnologiyalardan istifadə olunmaqla aparılmış yenidənqurma nəticəsində dalma avadanlıqlarının təmirinə çəkilən xərclərin azaldılmasına, təmirlər arası müddətin uzanmasına nail olunacaq, bu da müəssisənin maliyyə dayanıqlılığına mühüm töhfə verəcəkdir. İnnovativ metodların tətbiqi eyni zamanda müəssisənin rəqabət qabiliyyətini də artıracaqdır.”

Xatırladaq ki, müəssisə “Azneft” İB-nin tərkibində 1967-ci ildən fəaliyyət göstərir. 2018-ci ildə müəssisənin Mexaniki emal sahəsi müasir standartlara uyğun olaraq yenidən qurulmuşdur. Hazırda dalma qurğuları 331 quyuda istismar olunur. Dalma Elektrik Mühərriklərinin Təmiri Sahəsində il ərzində 1600 ədəd dalma elektrik mühərriki, 1600 ədəd hidromüdafiə qurğusu, 60 ədəd elektrik diafraqmalı dalma nasosu əsaslı və cari təmir olunur. Mərhələli keyfiyyətə nəzarət prosedurundan keçən hazır məhsul, sahənin sınaq bölməsindəki quyularda yoxlanılaraq istismara buraxılır.

14 Sentyabr 2020

SOCAR-da “KazMunayQaz” rəhbərliyi ilə görüş keçirilib

+

Sentyabrın 14-də SOCAR-ın prezidenti Rövnəq Abdullayev və Qazaxıstanın “KazMunayQaz” Milli Şirkəti” Səhmdar Cəmiyyyətinin sədri Alik Aydarbayevin rəhbərlik etdiyi nümayəndə heyətini qəbul edib.

Görüşdə neft-qaz sənayesinin bütün sahələri üzrə əməkdaşlıq perspektivləri müzakirə olunmuş, birgə iş planı barədə fikir mübadiləsi aparılmışdır. Görüşdə şirkətlər arasında geniş əməkdaşlıq perspektivləri, o cümlədən Xəzər dənizində geoloji kəşfiyyat işlərində, karbohidrogen xammalının kəşfiyyatı üzrə geoloji-geofiziki materialların birgə öyrənilməsi ilə bağlı imkanlardan bəhs edilmişdir. “KazMunayQaz” şirkətinə məxsus “Sətti” üzən qazma qurğusu üzərində modernləşdirilmə işləri SOCAR-ın CDC şirkəti tərəfindən həyata keçirilir. “Sətti” üzən qazma qurğusu vasitəsi ilə Xəzərin Azərbaycan sektorunda qazma işləri aparılacaq. Əməliyyat dövründə qurğu üzərində menecmenti SOCAR-ın CDC şirkəti həyata keçirəcək.

Görüşdə qarşılıqlı maraq kəsb edən digər məsələlər də müzakirə olunmuşdur.

Qeyd edək ki, ”KazMunayGaz” Milli Şirkəti” Qazaxıstan dövlətinin neft və qaz sənayesində maraqlarını təmsil edən, karbohidrogenlərin kəşfiyyatı, istehsalı, emalı və nəqlini həyata keçirən milli operatordur. Şirkət 2002-ci ildə yaradılmış, onun tərkibində 190-dan çox təşkilat birləşmişdir. ”KazMunayGaz”-ın səhmdarları ”Samruk-Kazyna” Milli Sərvət Fondu (90%) və Qazaxıstan Respublikasının Milli Bankıdır (10%).

14 Sentyabr 2020

“Xəzər Regionunun Ətraf Mühitinin Mühafizəsi Təşəbbüsü” (CEPI) üzrə Anlaşma Memorandumu imzalandı

+

14 sentyabr 2020-ci il tarixində SOCAR-ın “Ekopark: Ekoloji Tədqiqatlar Mərkəzi”ndə CEPİ üzrə Anlaşma Memorandumunun imzalanma tədbiri keçirilmişdir. SOCAR-ın təşəbbüsü əsasında SOCAR, KazMunayGas, BP, “Equinor” Abşeron AS və “Total E&P Absheron B.V.” şirkətlərinin təsisçiliyi ilə yaradılmış “Xəzər Regionunun Ətraf Mühitinin Mühafizəsi Təşəbbüsü” (Caspian Envıronmental Protectıon Initiatıve - CEPI) çərçivəsində Xəzər regionunun ekoloji dayanıqlığına təhlükə yaradan iqlim dəyişikliyi ilə mübarizə aparmaq, istixana qazlarının emissiyasını və ətraf mühitə atılan zərərli maddələrin qarşısını almaq üçün birgə proaktiv addımların atılması nəzərdə tutulur.

CEPİ-nin İcra Komitəsinin sədri, SOCAR-ın ekologiya üzrə vitse-prezidenti Rəfiqə Hüseynzadə tədbiri açılış nitqi ilə başlayaraq Təşəbbüsün gələcək fəaliyyəti və nəzərdə tutulan planlar haqqında məlumat vermişdir.

Anlaşma Memorandumu SOCAR-ın prezidenti Rövnəq Abdullayev, KazMunayGas şirkətinin idarə heyətinin sədri Alik Aydarbayev, BP şirkətinin AGT Regionu üzrə prezidenti Qəri Cons, “Equinor” Abşeron AS şirkətinin Azərbaycan üzrə ölkə meneceri Favad Qureyşi və “Total E&P Absheron B.V.” şirkətinin idarəedici direktoru Regis Agut tərəfindən imzalanmışdır.

Tədbirdə Azərbaycan Respublikasının Ekologiya və Təbii Sərvətlər naziri Muxtar Babayev, BMT-nin İnkişaf Proqramının Ölkə üzrə rezident nümayəndəsi Alessandro Frakassetti müşahidəçi qismində iştirak etmişlər.

İştirakçıların hər biri imzalanmış Anlaşma Memorandumunun əhəmiyyəti barədə çıxış etmişlər.

Qeyd etmək lazımdır ki, Rosneft, Gazprom və Eni şirkətləri CEPI-yə üzv kimi, BMT və BMT-nin İnkişaf Proqramı isə müşahidəçi qismində qoşulmaqları haqqında öz niyyətlərini bəyan etmişlər.

Anlaşma Memorandumu imzalandıqdan sonra tədbir iştirakçıları “Ekopark: Ekoloji Tədqiqatlar Mərkəzi”nin ərazisində ağac əkmişlər.

Xatırladaq ki, Azərbaycan Respublikası BMT-nin iqlim dəyişikliklərinə dair Çərçivə Konvensiyasına üzv dövlətlərin 21-ci konfransında qəbul olunan Paris Sazişini imzalayaraq, istixana qazlarını azaltmaq və ekoloji cəhətdən davamlı gələcəyə yol açmaq niyyətini geniş beynəlxalq ictimaiyyətə göstərmişdir. Paris sazişindən irəli gələn hədəfləri həyata keçirmək üçün Azərbaycan Respublikasının Dövlət Neft Şirkəti (SOCAR) ətraf mühitin təhlükəsizliyi və resurslardan səmərəli istifadə edilməsi, karbon intensivliyinin azaldılması və bölgənin davamlı inkişafının təmin edilməsi istiqamətində ən qabaqcıl ekoloji tədbirləri və həll yollarını davamlı olaraq tətbiq edir.

Qeyd: Tədbir açıq havada keçirilib və pandemiya dövrünün şərtlərinə uyğun olaraq, tədbir zamanı sosial məsafə gözlənilib.

11 Sentyabr 2020

“Azərikimya” İB-də modernizasiya və yenidənqurma işləri davam etdirilir

+

Azərbaycan Respublikası Prezidentinin 2014-cü il 26 dekabr tarixli Sərəncamı ilə təsdiq edilmiş “Azərbaycan Respublikasında sənayenin inkişafına dair 2015-2020-ci illər üçün Dövlət Proqramına” əsasən, Sumqayıt Kimya Sənaye Parkında “SOCAR-Polymer” Layihəsi çərçivəsində inşa edilmiş yeni polipropilen və yüksək sıxlıqlı poletilen istehsalı qurğularının dayanıqlı olaraq müvafiq keyfiyyət və kəmiyyət göstəricilərinə uyğun xammallar və enerjidaşıyıcılarla təmin edilməsi məqsədi ilə “Azərikimya” İB-nin “EP-300” qurğusunda daha çox məqsədli məhsullar istehsal olunması üçün mərhələlərlə modernizasiya və yenidənqurma işlərinə başlanılmış və hal-hazırda sözügedən layihə yekun fazasına daxil olmuşdur. Layihənin icrasına lisenziar və baş podratçı qismində 2016-cı ildə dünyanın taınınmış Technip şirkətinin İtaliya ofisi cəlb edilmişdir. Modernizasiya və yenidənqurma layihələri başa çatdıqdan sonra “Azərikimya” İB-də əsas məhsullar üzrə faktiki istehsal iki dəfə, bəzi məhsullar üzrə üç dəfə artacaq, zavodun istismar dövrü ən azı 20 il uzadılacaq, mövcud qurğuların etibarlılığı və səmərəliliyi yüksələcək və müasir standartlara cavab verən yüksək keyfiyyətli rəqabətə davamlı məhsulların istehsalı üçün təminat yaranacaqdır. Hazırda layihə çərçivəsində ( 1-ci faza) “Azərikimya” İB-də yeni 4 ədəd piroliz sobaları, quru qazın təmizlənməsi qurğusu, etilen və propilen saxlama anbarları, hidrogenin alınması və zənginləşdirilməsi və PPF-in təmizlənməsi qurğuları tikilmiş, bir sıra mövcud qurğu və avadanlıq əsaslı şəkildə rekonstruksiya olunmuş, zavodda yeni avtomatika-idarəetmə sistemi tətbiq edilmişdir.

Cari ilin 5 avqust tarixindən “Azərikimya” İstehsalat Birliyinin “Etilen-polietilen” zavodunun “EP-300” qurğusun yeni konfiqurasiyada istismara verilməsi məqsədi ilə zavodun fəaliyyətinin planlı dayanması baş vermişdir. Bu dayanma zamanı yenidənqurma və modernizasiya layihəsi çərçivəsində bütün tikinti-quraşdırma işlərinin tamamlanması və sazlama işlərinin aparılması gözlənilir. Oktyabr ayında zavodun istehsalat fəaliyyəti bərpa olunandan dərhal sonra yeni qurğuların mərhələli şəkildə istismara verilməsi və beləliklə də 2020-ci ilin 4-cü rübündə cari layihənin tam olaraq başa çatdırılması nəzərdə tutulur.

Görüləcək moderinizasiya işləri nəticəsində Buxar Turbogenerator qurğusunda layihə gücünün 32 Mvt/saatdan 65 Mvt/saata çatdırılması planlaşdırılır. Bunun üçün əlavə turbogenerator quraşdırılır və mövcud texnoloji sistem təkmilləşdirilir. Həmçinin “Azərikimya” İB-nin daxili imkanları hesabına mövcud köhnə yüksək gərginlikli yarımstansiya Etilen-polietilen zavodunun ərazisinə köçürülərək tam olaraq yenidən qurulur.

Layihə başa çatdıqdan sonra “Azərikimya” İB-nin Sumqayıt Elektrik Şəbəkəsindən aldığı 32 Mvt.s elektrik enerjisinə olan tələbatı ( EP-300 və Polimir-120 qurğularında) tam olaraq qarşılanacaq, qurğunun istehsal etdiyi izafi 33 mvt.s elektrik enerjisi şəbəkə vasitəsilə SOCAR-ın digər müəssisələrinə və eləcə də Sumqayıt şəhərinin digər elektrik enerjisi təlabatçılarına ötürülməsi imkanını yaradacaqdır.

Hazırda Layihə üzrə işlərin 65%-i icra olunub və onun tam olaraq 2021-ci ilin 2-ci rübündə yekunlaşması nəzərdə tutulmuşdur.

Bu günlərdə SOCAR-ın prezidenti Rövnəq Abdullayev “Azərikimya” İstehsalat Birliyinin Etilen-polietilen zavodunda olmuş, moderinizasiya, yenidənqurma və təmir işlərinin qrafikə uyğun başa çatdırılması üçün müvafiq tapşırıqlar vermişdir.

Xatırladaq ki, Modernizasiya layihəsinin əsas məqsədlərindən biri Sumqayıt Kimya Sənaye Parkında inşa olunmuş yeni “SOCAR Polymer” kompleksinin zavodlarını dayanıqlı rejimdə və lazımlı miqdarda etilen, propilen, saf hidrogen və enerji daşıyıcıları ilə təmin etməkdir. SOCAR-ın “Azərikimya” İB-də istehsal üçün istifadə olunan xammallar birbaşa SOCAR-ın digər müəssisəsindən - Heydər Əliyev adına Neft Emalı Zavodundan təchiz edilir. Layihədə çalışan işçilərin ortalama sayı sutkada 2000 nəfər olmuşdur ki, bunların 95% -ə qədəri yerli mütəxəssislərdir.