Azərbaycan Respublikası Dövlət Neft Şirkətinin Baş ofisində ARDNŞ, BP-Azərbaycan şirkətlərinin və Xəzər Mühəndislər İctimai Birliyinin birgə təşkil etdikləri “Gənc Mühəndislərin Qış Məktəbi”nin iştirakçıları ilə görüş keçirilmişdir. Şirkətin Kadr, rejim və informasiya texnologiyaları üzrə vitse-prezidenti Xalik Məmmədov Azərbaycan Dövlət Neft Akademiyası, Qafqaz Universiteti və Xəzər Universitetinin mühəndislik ixtisası üzrə fakültələrinin 24 tələbəsindən təşkil olunmuş Qış Məktəbi müdavimlərinə Azərbaycanda neftçıxarmanın tarixi, ARDNŞ-nin yaranması, fəaliyyəti və insan resurslarının idarə edilməsi strategiyası haqqında geniş məlumat vermişdir. “Əsrin müqaviləsi”nin Azərbaycana verdiyi töhfələr, gənc kadrların hazırlanması və onların xaricdə təhsillərinin davam etdirilməsi istiqamətində ARDNŞ-nin həyata keçirdiyi layihələrdən ətraflı bəhs edən Xalik Məmmədov tələbələrə təhsillərində müvəffəqiyyətlər arzulamışdır. Sonra Qış Məktəbinin müdavimlərini maraqlandıran suallara ətrafında canlı söhbət aparılmışdır. Qeyd etmək lazımdır ki, “Gənc Mühəndislərin Qış Məktəbi” fevralın 1-dən 7-nə kimi fəaliyyət göstərəcək. Məktəbin proqramının tədrisində Azərbaycanda çalışan xarici şirkətlərin əməkdaşları ilə yanaşı ARDNŞ-nin gənc mütəxəssisləri də fəal iştirak edirlər. ARDNŞ-nin Baş ofisinin əməkdaşı Araz Qocayev müdavimlər qarşısında “Azərbaycanın Qusar, Dəvəçi çökəkliyində karbohidrogenlərin əmələ gəlməsi və toplanması” mövzusunda təqdimatla çıxış etmişdir. Xatırladaq ki, ARDNŞ-nin maliyyə dəstəyi ilə Xəzər Mühəndislər İctimai birliyi 22-28 iyun tarixlərində də tələbələr üçün analoji tədbir - “Gənc Mühəndislərin Yay Məktəbi”ni təşkil etmişdi.

387